بسے ہوئے تو ہیں لیکن دلیل کوئی نہیں
کچھ ایسے شہر ہیں جن کی فصیل کوئی نہیں
کسی سے کس طرح انصاف مانگنے جاؤں
عدالتیں تو بہت ہیں عدیل کوئی نہیں
سبھی کے ہاتھوں پہ لکھا ہے ان کا نام و نسب
قبیل دار ہیں سب بے قبیل کوئی نہیں
ہے دشت غم کا سفر اور مجھے خبر بھی ہے
کہ راستے میں کہیں سنگ میل کوئی نہیں
ابھی سے ڈھونڈ کے رکھو نظر میں راہ مفر
یہاں ہے پیاس سے مرنا سبیل کوئی نہیں
مری شناخت الگ ہے تری شناخت الگ
یہ زعم دونوں کو اپنا مثیل کوئی نہیں
